Untitled



Þorvaldsdalsskokkið 2021

posted Jul 4, 2021, 2:43 AM by Þorvaldsdalsskokk UMSE

Vel heppnaðist Þorvaldsdalsskokkið 2021. Öll úrslit eru aðgengileg hjá Tímatöku.net sem líkt og í fyrra sáu um tímamælingu  hlaupsins. Frekari fréttir koma hér síðar. Hér má sjá öll úrslit!

Hlaup ársins - upplýsingar til hlaupara

posted Jul 2, 2021, 1:41 AM by Þorvaldsdalsskokk UMSE

Ágæti þátttakandi í Þorvaldsdalsskokkinu!

Velkomin til leiks í 28. Þorvaldsdalsskokkinu þann 3. júlí 2021. Hér eru helstu atriði sem vert er að hafa í huga í undirbúningi fyrir sjálft hlaupið. Við bendum líka á að ýmsar upplýsingar um hlaupið og staðhætti má finna á heimasíðu hlaupsins, thorvaldsdalur.umse.is.

Við gerum okkar besta til að tryggja öryggi keppenda en vekjum athygli á að hlaupið er um eyðidal þar sem fjarskiptasamband er ekki alltaf gott. Einnig vekjum við athygli keppenda á að kynna sér vel veðurspá á hlaupdag til að meta klæðaþörf. Sé þoka eða mjög lágskýjað getur komið til þess að fresta verður hlaupinu. Slík ákvörðun yrði tekin með tiltölulega stuttum fyrirvara en hingað til hefur hlaupinu einu sinni verið frestað um einn dag.

Hlaupið hefst við brúna yfir Ytri-Tunguá milli bæjanna Dagverðartungu og Fornhaga í Hörgárdal. Við rásmarkið verða staðsett salernisaðstaða. Svæðið er þröngt og því biðjum við þá sem koma að rásmarki á eigin bílum að leggja þeim við réttina sem er u.þ.b. 150 m sunnan við rásmarkið, niður með Ytri-Tunguá. Þeir sem eru skráðir í rútuferð frá markinu þurfa að vera mættir fyrir 11 að Árskógsskóla en þaðan fara rútur með keppendur uppúr 11. Hlaupið er síðan ræst kl. 12:00.

Við hvetjum ykkur til að kynna ykkur Þorvaldsdalinn, t.d. með því að skoða heimasíðu hlaupsins en þar eru tenglar á kort sem sýna leiðina. Um óbyggðahlaup er að ræða og engin ákveðin leið sem þarf að hlaupa en gæta þarf þess að hafa fjallshlíðina á hægri hönd og ána á vinstri hönd alla leið nema þegar hlaupið er á vatnaskilum. Upp frá Fornhaga er hlaupið til norðvesturs en fljótlega sveigir dalurinn til norðurs. Fyrstu rúmlega 6 km er hlaupið upp í móti og er um rúmlega 400 m hækkun að ræða. Fyrsta drykkjarstöð er eftir u.þ.b. 5 km, þ.e. áður en hæsta hjalla er náð. Önnur drykkjarstöð er eftir tæpa 11 km og er hún staðsett rétt áður en komið er að stóru framhlaupi (hrauni skv. norðlenskri málvenju) er nefnist Hesthraun. Þar er hlaupurum beint á leið sem liggur neðan við framhlaupið meðfram ánni. U.þ.b. 5 km síðar koma hlauparar að jeppaslóða sem smá saman þroskast í grófan malarveg. Veginum er gott að fylgja nema hvað við stærstu þverána, Hrafnagilsá, er gott að hlaupa yfir á göngubrú sem staðsett er ofan við vaðið. Til að komast að brúnni borgar sig að sveigja til hægri nokkru áður en komið er að vaðinu (annars þarf að vaða alldjúpt síki) og verður sú leið merkt með flaggi. Norðan við göngubrúna yfir Hrafnagilsá er þriðja drykkjarstöðin og eru þá rúmlega 6 km í mark. Síðasta drykkjarstöðin er síðan við afréttargirðinguna og eru þá einungis 2,5 km í mark.

Þrátt fyrir að oft megi fylgja kindagötum á Þorvaldsdalnum þá eru aðstæður oft slíkar að enga götu er að sjá. Við hvetjum keppendur til að fara með gát og vonlaust má telja að hægt sé að hlaupa dalinn án þess að vaða mýrar og læki.

Á fyrstu tveimur drykkjarstöðvunum, þ.e. sem eru ekki í vegasambandi, eru staðsettir björgunarsveitarmenn auk starfsmanna hlaupsins. Þar að auki verður einn björgunarsveitarmaður staðsettur u.þ.b. á vatnaskilum en sá aðili verður hreyfanlegur og því ekki víst að hann verði allan tíma á sama stað. Björgunarsveitin mun einnig staðsetja bíl og mann u.þ.b. þar sem jeppaslóðinn endar.

Í vanda eða við slys þá biðjum við ykkur að hafa samband hið fyrsta við starfsmenn hlaupsins. Ef það kemur þoka og þið villist (séuð þið á annað borð komin norður fyrir vatnaskil þannig að þið getið treyst því að áin á vinstri hönd sé Kytruá sem síðar verður Þorvaldsdalsá ætti ekki að vera mikil hætta á að villast) er afar mikilvægt að byrja strax að lækka sig. Fylgið vatnsföllum ef þið komið að slíku og gangið niður. Fari svo að þið skilið ykkur aftur niður að rásmarki er mikilvægt að láta starfsmenn hlaupsins vita af ykkur svo ekki verði kölluð út leit.

Tímamörk á hlaupinu eru 5 klst!

Afhending keppnisgagna!

posted Jun 30, 2021, 2:43 PM by Þorvaldsdalsskokk UMSE   [ updated Jun 30, 2021, 4:35 PM ]

Hægt verður að nálgast númer vegna Þorvaldsdalsskokksins fimmtudaginn 1. júlí 17-18 og föstudaginn 2. júlí 15-18. Afhending fer fram í útsölumarkaði aðalstyrktaraðila hlaupsins, 66°N að Skipagötu 9 á Akureyri. Einnig er möguleiki að fá númer afhent að morgni keppnisdags, við Árskógsskóla frá kl. 9:30 og við start í Hörgárdal rétt áður en hlaup hefst en í því tilfelli væri gott að keppendur hafi samband við hlauphaldara.

Leiðarval í Þorvaldsdalnum!?

posted Jun 17, 2021, 2:35 PM by Þorvaldsdalsskokk UMSE   [ updated Jun 17, 2021, 2:41 PM ]

Nú styttist í hlaup ársins sem verður laugardaginn 3. júlí! Þorvaldsdalsskokkarar verja oft vetrinum í efasemdir um leiðarval síðasta sumars og undirbúning fyrir næsta hlaup. Gott getur verið að leggjast yfir loftmyndir eða skoða feril síðasta hlaups. Um leið og skipuleggjendur skokksins benda á að leiðarval er algjörlega frjálst (meðan ekki eru troðin niður óslegin tún bænda) þá er sjálfsagt að deila með verðandi keppendum leið þeirri sem Starri Heiðmarsson hljóp sumarið 2020 en hér má sækja gpx skrá af leiðinni.

Vert er að benda á að leiðarval Starra getur verið allrar gagnrýni vert ;-)

Yfir 220 hlauparar skráðir nú þegar

posted Jun 16, 2021, 7:46 AM by Ungmennasamband Eyjafjarðar UMSE   [ updated Jun 16, 2021, 8:12 AM ]

Þann 3. júlí verður 28. Þorvaldsdalsskokkið þreytt!
Nú þegar eru yfir 220 hlauparar skráðir til leiks og eru mótshaldarar fullir tilhlökkunar að taka á móti keppendum. Enn er opið fyrir skráningu í hlaupið. Bæði er hægt að skrá sig á www.hlaup.is og í tölvupósti á thorvaldsdalsskokk@umse.is.

Við erum svo lánsöm að margar hendur vinna létt verk. Flestir sjálfboðaliðarnir okkar eru hafsjór af reynslu í kringum hlaupið og útivist, auk þess eru stöðugt nýjir að bætast í hópin. Við höfum líka stóran hóp samstarfsaðila. 66°norður hefur verið okkar aðal styrktaraðili og nú var Sjóvá koma inn við hlið þeirra sem einn af aðal styrktaraðilum skokksins. Þá hafa Hauganes Whale Watching, Sporttours, Papco, Hleðsla, Gatorade, Terra, og Húsasmiðjan verið þátttakendur í þessu með okkur. Í fyrra bættist svo við Björgunarsveitin Dalbjörg, sem aðstoðar við gæslu og öryggi.


Skráning opnar kl. 12:00, 10. mars

posted Mar 9, 2021, 2:52 AM by Ungmennasamband Eyjafjarðar UMSE   [ updated Mar 10, 2021, 5:08 AM by Þorvaldsdalsskokk UMSE ]

Skráning í 28. Þorvaldsdalsskokkið opnar á morgun, 10. mars kl. 12:00.
Skráing fer fram á www.hlaup.is


28. Þorvaldsdalsskokkið

posted Jan 2, 2021, 12:58 AM by Þorvaldsdalsskokk UMSE

Þann 3. júlí verður 28. Þorvaldsdalsskokkið þreytt! Það er von hlaupahaldara að mögulegt reynist að halda hlaupið án mikilla takmarkana en fylgjumst grannt með og uppfærum upplýsingar hér á síðunni eftir þörfum. Fljótlega verður opnað fyrir skráningar!

27. Þorvaldsdalsskokkið

posted Jul 5, 2020, 3:47 AM by Þorvaldsdalsskokk UMSE

Lokið er 27. Þorvaldsdalsskokkinu sem fór fram við góðar veðuraðstæður 4. júlí 2020. Færið á dalnum var hins vegar með "kaldara" móti en sakir snjóþunga vetursins voru feikn af snjó sem hlauparar þurftu að hlaupa yfir og var þetta umfram það sem elstu menn muna! Í fyrsta skipti var öll tímataka í höndum "timataka.is" og er hægt að sjá öllu úrslit á síðu þeirra.
Laugardaginn 3. júlí 2021 verður Þorvaldsdalsskokkið þreytt í 28. sinn!

Nettó bættist í hópinn

posted Jul 3, 2020, 7:57 AM by Ungmennasamband Eyjafjarðar UMSE

Nettóverslunin Glerártorgi var að bætast í hóp samstarfsaðili. Þeir hafa verið með okkur áður og bjóðum þá velkomna aftur.


Bílastæði og rúta

posted Jul 2, 2020, 9:42 AM by Ungmennasamband Eyjafjarðar UMSE

Keppendur í Þorvaldsdalsskokkinu, sem fara með rútunni þurfa að leggja bílum við félagsheimilið Árskógi (Árskógarskóli). Rútan fer svo þaðan. Bíll frá okkur verður í rásmarki sem getur tekið við fatnaði og verður hann síðan staðsettur við markið.


1-10 of 79